صبَاحْ الْخِيرْ يَا بْلادِي

صْبَاحْ الخِيرْ وْالتِّيسِيرْ

لِيكْ نْكُولْ يَا بْلادِي

وْعْلَى الله التْدْبِير

وْحْدُوعَالْمْ لاَيْنْ تْعُودِي

وآش اللِي لِيكْ يْصِير

نَاسْكْ فِي الايَّام تْلالِي

عْلَى مَعِيشَة كِْريمَة وْفِي الخِيرْ

غَايْتْهُمْ فِي الأيَّام وْالليَالِي

لْرْزِيْقْ مْسْتُورْ وْيْسِيرْ

صَوَّاتْهُمْ عْلَى لْعْوِينْ تْنَادِي

فِي زْمَانْ صْعَابْ فِيهْ التْدْبِيرْ

مَالْقَاوْا اللي يْسْمَعْ لِيهُمْ وْلا اللي

عْنْدُه قْلْبْ كْبِيرْ

يْحْنْ فِيهُمْ وْيْوَاسِي

أو فْعْلْ الخِيرْ فِيهُمْ يْدِير

كِيفْ حَالْ سَاسْتْكْ يَا بْلاَدِي

اللي هَامُوَا فِي الغْشْ والتْزْوِيرْ

وْنْهْبُوا خِيرَاْتكْ وْحْقُوقْ اوْلاَدْ بْلاَدِي

ومَا هْمْهُم التْدْبِير

قِيمْتْكْ عْنْدْهُومْ فِي التالِي

ومَاشِي مُهِمْ التآخِيرْ

فِي يامْكْ وْلاَ فْمْكَانْتْك بِين الغِيرْ

صْبْحُوا بِبَانْكْ مْفْتُوحِين للْعَادِي والبَادِي

للي فْبَالُو لْغْدْرْ او اللي نَاوِي الخِيرْ

تْهَافْتَات عْلِيك نْسُورْ الوَادِي

الكْبِير فِيهُم قْبْلْ الصْغِيرْ

تْنْهْشْ فََلَحْمك وْتْنَادِي

بِاسْمْ الحْقْ فِي التغْيِير

يْحُومُوا فْسْمَاكْ وْيْحْجْبُوا نُورْكْ البَادِي

سَامْرِينْ عْلَى كُلْ فْرِيْخْ يْحَاوْلْ يْطِيرْ

يْلْتَهْمُوهْ فِي السْمَا وْمَا عْنْدُو مَا يْدِيرْ

وعْلَى كُلْ شْجِيرَة زْرْعْتِي وْ سْقِيتِي

يْجْنِواْ تْمَارْهَا وْيْخْنْقُوا نْسِيمَْهَا العْطير

وكُلْمَا بْدْعْتِي آو انْتْجْتِي

مَالِيهْ غِيرْ النْهْبْ أو التْصْدِيرْ

آيامْكْ فالعْرَايْضْ والكَرَمْ قْضِيتِي

مْعَ نَاسْ مَا يْعْرْفُوا الخِير

كُلْ مَا دْرْتِي عْنْدْهُم غِير تزهطير

وخِيرْكْ عْنْدْهُم فِي بْنْدِيرْ

يْلاَ طْبْلْتِي عْلِيه شْتَاتُو فِي الهْوَاء يْطِيرْ

مراد جوروحي : monmourad@yahoo.fr