الله يجعلْني ْنتيق / بقلم مراد جوروحي

الله يجعلني نتيق
شي نهار بالّلي ايام الضيق
غير دايزة

 ومازال ابنادم يِعيق
وينصف خوه ابنادم

 ويرجع حق الصديق
اللي اتهضم سهمو

 بلا ما يعيق
الله يجعلني نتيق
بلي النِّفاق والتبلحيس

اللي بئرهم عميق
غادي يجي يوم

 وْيتردم على اماليه
وما يظهر له

 في البقاع شقيق
وكلام الكدوب والتلفيق
سلاح كل سَلوقي افَّاق
واللي بيهم وصل

 يحكم الناس من الفوق
وصبحات ليه كلمة

 مسموعة بلا بوق
ما تعود ليه

 قيمة فالاسواق
والناس لخباره

 ما تعود تسيق
وبنادم بخداعه يعيق
الله يجعلني نتيق
بلي سياسة التلفيق
اللي ركايزها

 غير تخربيق
ما تعود تليق
واماليها

يكلعوا من الطريق
ويقوموا على الكرسي

 اللي جسدهم

عاد بيه لصيق
ويخلوه لناس بيه تليق
الله يجعلني نتيق
بلي شي نهار نصبح
نلقى فيه الناس

 بدنيتها تفرح
وِبيبَان الخير

 في وجوههم تفتح
والحق يصبح

 ليهم واضح

الواجب عليهم يديروه

 بلا تابع ولا ناصح
يرعاوا للمعقول طريقو
وللكرامة وعزة النفس يتُوقو