كِيفْ حَالْكْ يَاحُومْتِي
كِيفْ حَالْ اهْلْكْ اللي ضْميتِي
فِي احْضَانْكْ وْخْبيتِي
وْضْدْ الجوعْ وْصْنَاعُوا احْمِيتِي
وْغِيرْ بْالبَرَكَة وْالتعَاوُنْ قْدْرْتِي
تْخْلِي الناسْ تْعِيشْ بْالسْتْرَة
وْالمُهِمْ هُوَ عْنَايْتْهُمْ وْعْنَايْتِي
فِيكْ لْقَاتْ عَائلتي
بُويَا وْخْتِي وْخُويَاوْممْتِي
وْحْتى وْلْدْ عْمي وْخَالْتِي
عْنْدْ الحْزة وْالضيقْ
مْوَاسْيَة الجارْ وْالرْفِيقْ
وْوَقْفَة الْخُو وْالصْدِيقْ
لَكِنْ جَاتْ يْدِينْ آحُومْتِي
نَاسْ عْلِيهُمْ مَاعُوْلْتِي
هْدْمَاتْ كُلْمَا بْنِيتِي
بْعْدَاتْ بِينْ الناسْ اللي قْرْبْتِي
وْشْتاتْ الصْحَابْ اللي لْميتِي
اصْبْحْ كُلاَ تَايْهْ فِي هْم
مْلْهِي مَا طَالْ يُومُو
يَالْقَا شِي مَا يْلْمو
بَاشْ غِيْر يَاكُلْ وْيْسْدْ فْمو
كْبْرَاتْ فِي اهلْكْ الأَنَانِيَة
وَمَابْقاوْا يْتِيقُوا فِي النيَة
بَرَاكْتْكْ صْبْحَاتْ بْلاَ حْمِيَة
وْالايمَانْ وْلا غِيرْ شْوِيَا
الْخُبْثْ وْالْحْقْدْ بالنوية
صْبْحُوا هُمَا الْحْكْمَة وْالحِيلَة
وْالشبَابْ غْلْبَاتُو البْلْيَة
بْلْيَة التيهْ وْالاتْكَالِية
وْلاَ بْغَا غِيرْ يْهْرْبْ مْنْ هْنَايَا
وْمَا بْقِيتِي فْهْمْتِي لُو غَايَة
كْتْرَاتْ فِي اهْلْكْ السْعَايَة
وْلاَوا قاَدْرِينْ يْبِيعُوا نْفُوسْهُمْ السْوالَة
بْالتْقْسِيطْ أو عْنْدْ الجمالَة
وْبْنَاتْكْ صْبْحَاتْ سْبَايَا
عْنْدْ قُومْ جُهَالَة
مَا كُلْتْ لْحْرَامْ فِيهُمْ سْلاَلَة
تْرْباوْا فِي السْرِيقَة بْلاَ وَالِي وْلاَ دَايَة
شْرْهُم وَاصْلْ لْهْنَاكْ وْهْنَايَا
وْفُوقْ هَذَا لِيهُمْ الْحْمَايَة
نَاسْيِينْ بْاللي السْوَايْعْ بْدالَة
وْالناسْ مْعَ الأَيامْ غِيرْ جْوالَة
كُنَا وْكْنْتِي يَا حُومْتِي الْغْزَالَة
آشْ وْصْلْكْ لْهَادْ الْحَالَة
تْهْدْمُوا بْيُوتْكْ وْلاَوْ حتالة
وْالْمْزْيَانْ فِيكْ ولا مَصِيرُوا الزْبالَة
وْرْكَايْزْكْ تْحْرْقُوا حْرِيقْ الْكْبالَة
تْشْوَى بْالنارْ وْتْطْفَى فِي مَاءْ مْلْحْتُ دْبالَة
