يوم الهنا و يوم السعد

هذا يوم الهنا و يوم السعد

الطريق مزوقة بالزهر و بالورد

و الناس خدامة وخا نهار الحد

الخدمة مداومة بلا حد

حيث كلشي لغدوة لازم يوجد

واخا تجبدو الجهد من قلة الجهد

كلشي ينوض و يتوكض

غادي تشبعو راحة من بعد

كل من هو أمر لازم يتنفد

و كل من هي حفرة لازم تسد

و كل من هو قديم لازم يتجدد

هذا يوم الهنا و يوم السعد

لفلوس موجودة و غادية تقد

غير صرف و آرى ما تمد

بلا ما تحصي و بلا ما تعد

من بعد و نديرو الجرد

و اللي شاط ما يترد

و اللي سال ما ليه رد

هذا يوم الهنا و يوم السعد

ففجر يوم الغد

جمعوا الناس واحد واحد

يوقفوا جنب الطريق وخا البرد

الراية فيد و الصورة فيد

صواتهم بالصياح لازم تنشد

و لو الحر عليهم يشتد

الصغير بحال الكبير مستعد

و كلمة وحدة لازم تتردد

.....

هذا يوم الهنا و يوم السعد

بقات ثلث سوايع و يجي الحشد

تصافات الناس بحال شي سد

القصير لقدام و اللور لطويل القد

داق المكان و ما بقى يقد

كثر الزحام و الجو فسد

ينقز لمقدم بحال القرد

على الناس يبدا يتبورض

و صوته عليهم يغلض

ارجع اللور و ما تفوت الحد

ما بغينا بسالة هداك الولد

و القايد وراه مبند

يأمر غير باصبع اليد

هذا يوم الهنا و يوم السعد

مجمر المكان بدا يزند

و الموكب جاي بحال الرعد

هديرو كيتسمع من البعد

الرجال تصفق و النسا تزغرد

يبان مول البرية و مول الطرد

غير يوصل سيدنا نحطها ليه فاليد

و البوليسي ما عندو ما يشد

و فلمحة البرق يمر الحشد

و جو المكان يبدا يبرد

تكول الناس هادشي كان مجهد

داز بالزربة و ما شفنا حد

كون غير جا على ظهر شي عود

او خلانا غير نبوسو له اليد

مراد جوروحي

monmourad@yahoo.fr