قصيدة جديدة بعنوان : القلبة مهضورة

 

 القلبة مهضورة

فرش الكلام

واجي نعاود ليك الهيضورة

المعقول خواضو بان

و بلاصتو عادت محضورة

و اللي كان غادي نيشان

مع الوقت جاب الدورة

كلمتو اللي كانت برهان

بالكدوب عادت منجورة

غلبات الناس و الميزان

و بين القوم ولات مغرورة

الصحيح اصبح عيان

و داته صابتها الضرورة

عقله قاسو الجنان

و روحه معاه مقبورة

القلبة مهضورة

فرش الكلام

واجي نعاود ليك الهيضور

الواحد عايش في المنام

يشوف في الصيف لخضورة

يقرى على ضله السلام

و يمكن يلعب معاه الكورة

غير يفيق يرجع ينام

حيت الوقت عنده معبورة

بين سوايع يعيشها في الاحلام

و الباقي غير حياة مجبورة

 

 

القلبة مهضورة

فرش الكلام

واجي نعاود ليك الهيضورة

الشجرة تاهت في الجنان

و تمرتها في الارض منثورة

عادت لعبة في يد الصبيان

ملي ضارت عليها الدورة

و اللي كانت عالية الشان

مع الوقت صبحات محكورة

ضي الكمرة ما عاد يبان

و الناس عليه محسورة

تكول هذا هو البرهان

و الحساب يمكن جاب الفورة

هذي هي سيرة بني الانسان

اللي فالكتوب مذكورة

مع الوقت ولات تبان

و تخلي القلبة مهضورة

ملي ابنادم يفرش الكلام

و يبدا يعاود غير الهيضورة

بقلم : مراد جوروحي