هربت حتى عييت
من ظل همومي الجوالة
ما دريت كيف بيها اتبليت
ولا آش ليا غدوة عوالة
ظل ما يحتاج له تتبيت
و فراقه على جلدي استحالة
ما نسبقه حتى يلا جريت
و ما تنفع معاه زربة و لا تقالة
تابعني و لو منه سخيت
و نكول راه السوايع بدالة
فاضحني للناس و لو تواريت
ما تهمو سترت البيت
و لا مواريت النوالة
كلامه باسل و مقيت
بحال دوك القوم الجهالة
يهدم كل ما بنيت
و يهمل صنيع الرجالة
يكره كل ما بغيت
و يتبع النفس السوالة
وخى ليه منو شكيت
باش ينصفني بعدالة
او يجبر خاطري يلا بكيت
بكلمة زينة قوالة
يجاوبني بحال يلا النيت
على الصح باغي يتعالى
سير ما انت غير جريت
ايام ديك لغلالة
طول عمرها مخبية في بيت
و اخرها على فنيتة عوالة
بقلم : مراد جوروحي
Aucun commentaire:
Enregistrer un commentaire