اليكم قصيدة جديدة بعنوان : هلال الفرح

هل هلال الفرح

و الناس بالعين رمقاتو

كالوا واش هذا صح

ولا غير رفاتو

النخلة نتجات البلح

و لا فالواد طرحاتو

الفقيه فخطابو فلح

او غير مكتر فغواتو

باغي بكلامو ينصح

و الناس ماسمعاتو

 

قصيدة جديدة بعنوان : ظل همومي

هربت حتى عييت

من ظل همومي الجوالة

ما دريت كيف بيها اتبليت

ولا آش ليا غدوة عوالة

ظل ما يحتاج له تتبيت

و فراقه على جلدي استحالة

ما نسبقه حتى يلا جريت

و ما تنفع معاه زربة و لا تقالة

تابعني و لو منه سخيت

و نكول راه السوايع بدالة

فاضحني للناس و لو تواريت

و كاشفني للقريب و لمن والة

قصيدة جديدة تحت عنوان : موسم الولي الصالح سيدي موازين

 

موسمنا واقف 

بلا خيل

بلا تبوريضة

بلا علام

و لا صربة شديدة

اصبح تابع الوقت

و زواق الموضة

بيع و شرا

و ميزانية غليضة

فنانة من كل بلاد

شي حامل سيف

و شي معاه وريدة

شي بغا وقت لطيف

وشي طامع فهمزة لذيذة

من لثنين تاع مريكانا

مشارك ولد منانة

كنيته سنطانة

لابس شي بطانة 

ومعاه شي بنت نغمانة

الليلة تبات مصدعانة

النهار تدوزو نعسانة 

و الليل واقفة سهرانة

غير وصل سنطانة

كاليك بغا شي رمانة

وخا تكون خمجانة

باش يشرب عصيرها

عاد تجيه الكانة

و ينشط شوية معانا

اما هذاك جنيور

ولد ابا كبور

شحال فيه دلهضور

من البارح و هو يدور

تايقلب على البخور

كاليك بغا يزور

شي والي فالصخور

ويبني عليه شي صور

هاد السي جنيور

فشوشو ما ليها منضور

فالعشا بحال الفطور

تلقاه غادي و يفور

حيت ديما مخمور

حتى ولا عقلو 

غير اللور اللور

من لثلاث تلكوباص

جا خوليو اكليسياس

شويا ناقص نعاس 

حيت مريض بالوسواس

الله يحد الباس

خاصو ديما عساس

يحميه من كلام الناس

جبنا ليه خليع فاس

و عيساوا ديال مكناس
باش يهز الراس
و يغني ولو بالقياس
وخى غير بالكلاس
حيت يلا وقع شي باس
وفات حتى تقاس
ما ترحمنا لاصرانص
وما يخصنا منها خصاص

اما من لاربعة دلندن
جانا التون دجون
مول كاع الفنون
و شويا ديال العفون
معركها معجون
حتى عاد مفتون
و بلباسو مشطون
حلف ولد الملعون
نون يا كحل العيون
باللي خاصو العربون
باش ما يبقى مغبون
و بخلاصو مرهون
جبنا لو العربون
من فلوس التلفون
اش كاع غادي يكون
الباراكة فماروك تليكوم

اما لالاهم شكيرة
حريرتها هادك حريرة
باينة غير من التصويرة
مولات الهمزة الكبيرة
عوالة تخلي الاولاد فحيرة
و البنات فغيرة
لابسة دريرة
و محزمة بدريرة
تكولها باقيا صغيرة
حيت الوجه قصديرة
و الكسدة بيها تنوعيرة
غير الله يلهمنا الصبر 
و حسن التدبيرة 


و باش يكمل الحساب 
جا عمرو دياب
بعد طول غياب
كاليك جا و جاب
ينادي و يكول آ لحباب
و يغني على الحب و العداب
تكلمو شي شباب
واقفين عند الباب
فيهم حرقة البلاد
و حرقة الناس
العايشة فالعداب
كالو ليه
عدابك ماشي عداب
ما هو غير بيع و شرا
و كلام فكتاب
هضرة خاوية
و هريد الناب
اما عدابنا
علينا طرح سؤال
و ما لقينا لو جواب
عداب خلى
ابنادم خياب
و ما بقى يفرق
بين العديان
و الصحاب
هذا وقت
تسد فيه الباب
على الصح
و تشهرو الكلاب 
ما بقى للواحد ما يكول
غير الله يلعن اللي
كان حيلة و سباب 

بقلم : مراد جوروحي

أغنية داويني في حق الفنان المرحوم محمد السوسدي

توفي صباح اليوم، الثلاثاء 17 يناير 2012 الزجال و مغني مجموعة لمشاهب، الفنان محمد السوسدي، بمستشفى محمد الخامس بالدارالبيضاء بعد أزمة مفاجئة حادة في جهازه التنفسي، أسكنه الله فسيح جناته

تعازينا الحارة الى أسرته و كل عائلته و الى مجموعة لمشاهب

إنا لله و إنا إليه راجعون.

قصيدة جديدة بعنوان : بلادي و روحي

نجيك يا بلادي و فيدي روحي

ما تسمعي مني بكا و لا حس نوحي

دمي تقاضى و نشفو جروحي

ليلي طال و تاه صباحي

و يلا انا مشيت تعود اشباحي

وخا تشوفيني نايم راني ساحي

ما يهمك قدومي او رواحي

ولا فين هبت رياحي

نوصيك بسري عنداك تبوحي

و يلا تألمتي بدموعي ارتاحي

بلادي يا اللي عليك نواحي

من ضغينتك طلقي سراحي

راني عييت و حطيت سلاحي

سفينتي غرقات و ضاع ملاحي

بابي تسد واتجلى مفتاحي

انا بهمك تكسرو جناحي

و من سواد ليلك

هروبي و جماحي

و كترة عياطي و صياحي

لكن طيفك ديما حاضر

في اوقات احزاني و افراحي

يا بلادي يا للي فيك روحي

لطريق الصح لازم تروحي

و لو نسقيك من الدم اقداحي

او من كلام اشعاري و امداحي

في زواق الكلام عنداك تطيحي

اللي منه محال تربحي

لسان المعقول بيه تنصحي

وخى من شدته يمكن تجرحي

مع الايام بيه تصلحي

و باولادك و بناتك

يمكن تفرحي

بقلم : مراد جوروحي