شطحت الايام على الاعباد
ملي تحزمات بالكدوب و الناس بعاد
على الصح و خير البلاد
وفي انغام الذل لاحت الاولاد
و البنات ما بقى ليهم اوتاد
و الكرامة تلفات على القلوب و الاكباد
قالت الايام هادو ناس جداد
سقفهم رايب و ماليه اعماد
باعو نفوسهم و البلاد
و صبحو مع الوقت مراض
واخا يبانوا طوال و غلاض
الكسدة عامرة غير بالخواض
و جمرة الروح صبحات رماد
المعقول عندهم اداه الواد
و ما عاد ليهم كرامة الاجواد
ولا دعوة الفقيه في الاعياد
و تاهو حتى على قبور الاجداد
شطحة الايام ليها نبرة
تعزفها جدور ديك الشجرة
و تتمايل عليها الاغصان و الثمرة
و تقول مال حال هاد الشجرة
ما بقات تقدر تبرى
و لا اوراقها ترجع خضرة
او بين الاعباد تصبح حرة
ما بقى ليها غير كثرة الهضرة
و تتعلم شطحة الوترة
اللي يحكمها عويد بنقرة
تتمايل معاه ديك الشجرة
تصيح و تقول منك ما نبرى
زيدني نقرة اخرى
شطحة الايام تابعها عداد
يحسب و يعد في افعال الاعباد
الضعاف فيهم بحال الشداد
لقا الحساب اعوج و مافيه ما يتكاد
الباطل احكم حتى في الاعراض
و ابنادم تلف بين كون و عاد
ما بقى ينفعو لا مال و لا اولاد
و لا صحبة الحكام و القياد
غير رحمة العلي الجواد
اللي قادر يشوف من حال البلاد
و يرد بيد البنات و الاولاد
في الدنيا قبل يوم الميعاد
بقلم : مراد جوروحي
monmourad@yahoo.fr
Aucun commentaire:
Enregistrer un commentaire