أنا الريف يا الريف
من زمان و انا منسي
و عايش غير بالسيف
في حرتي كل عام نقاسي
و حصادي ديما خفيف
نشوف اهلي و ناسي
ونقول زهرهم يمكن قسيف
صياحهم يقلق نعاسي
و حلقهم قرب يجيف
فالزناقي كترو حراسي
و كلامي حسبوه عنيف
زطاطي رضوه عساسي
و دفعوني نزرع الكيف
باش يهدو حجر ساسي
و يعود صوري ضعيف
دخلوني في هبال سياسي
و قالو ما عندك شريف
قلبي حسبوه قاسي
و ربيعي رضوه خريف
اخداو دهبي و نحاسي
و اصبحت في ارضي كيف الضيف
انا الريف يا الريف
اولادي و ابناتي احرار
و لو قصفوهم قصيف
سنين يشربوهم لمرار
و القلب ديما عفيف
كيفما كان الغدار
قادرين نردوه سخيف
و داك اللي بدا العار
نخليوه يرجف رجيف
انا الريف يا الريف
مغربي من ارض الريف
ما همني تشريف
ولا طامع في تكليف
بغيت غير سياسة الزيف
و الكلام اللي مخبي في الطيف
و دوك اللي مرضو بالتخريف
يخرجو للرصيف
يسمعهوم لطرش و يشوفهم لكفيف
باش يعود بيت الريف
كيف كان، ديما نظيف
و على التفاهة و الزيف
ناسو
ديما هازين النيف.
بقلم : مراد جوروحي
