سَلاَ يَا مَدِينَة الشمُوعِ وَالدمُوعْ
يَا اللي أَذَانْكْ وْحْدُو فِيهْ الهْبُوطْ وْالطْلُوعْ
شْمُوعْكْ ضْوَاوْ لَيَالِيكْ وْخْلاَوْا الليل يطوعْ
لْعْشَاقُوا وْعْشاقْ السْهِيرْ وْالجْمُوعْ
فِيكْ نْضْموا الكْلاَمْ والقْصَايْدْ مْنْ كُلْ نُوعْ
عْلَى سْوَارْكْ وْقْوَاسْكْ
و عْلَى ْالطاجِينْ اللي فِيكْ مْصْنُوعْ
بِيكْ كَانْ الناظْمْ مُولُوعْ
حْكَا عْلَى أَيامْ زْهَاكْ
وْعْلَى ايامْ الجُوع
عْلَى اللي كَانْ فِيكْ
وْعْلَى اللي اصْبْحْ مْمْنُوعْ
كَانْ فِيكْ بْنَادْمْ بْالبْرْكَة قَنُوعْ
وْلْفِعْلْ الخِيرْ مَا يْتْأَخرْ فِي شْرُوعْ
كْلاَمْ الحْقْ كَانْ دِيمَا فِيكْ مْرْفُوعْ
وْبِينْ الدْرُوبْ وْالناسْ سَاهْلْ يْدِيعْ
لَكِنْ مْعَ الأَيامْ اصْبْحْ مْقْمُوعْ
وْنَاسْكْ مَا بْقَى فِيهُمْ شْجِيعْ
كْتْرَاتْ فِيهُمْ غِيرْ الهْضْرَة الخَاوِيَة وْالتْشْنِيعْ
فِينْ رْجَالاَتْكْ اللي كَانْ كْلاَمْهُمْ حْكْمَة وْخْشُوعْ
وْاللي كَانُوا بْحَالْ عْقْدْ ثْمِينْ بْالجَوَاهِرْ مْرْصُوعْ
كُلْهِمْ رَاحُوا وْرَاحْتْ ثَقَافتْكْ اللي كَانْتْ سْدْ مْنِيعْ
ضْدْ التْفاَهَة وْالتْمْيِيع
وْاصْبْحْ كُلْشِي غَادِي غِير بْالتْرْقِيعْ
فِينْ فْرْحَة اوْلاَدْكْ بْالنْزَاهَة أيامْ الرْبِيعْ
فِي جْنَانَاتْ وْسْوَانِي رِيحْهُمْ بْدِيعْ
واللي صَارُوا الْيُومْ للْتْقْسِيمْ وْالْبِيع
بْفْضْلْ سْيَاسَة التهْيِئَ وْالتْقْطِيعْ
بِيهَا فْصْلِوا وَادْكْ عْنْ اليَنْبُوعْ
وْرْجْعُوهْ بْحَالْ شِي حنشْ رَاسُو مْقْطُوعْ
حْوْلُوا المْنْظْرْ الزْوِينْ لْبْشِيعْ
المُهِمْ عْنْدْهُمْ غِيرْ البْنِي وْالشْرُوعْ
فِي جْمِيعْ الفْلُوسْ وْيْبْدَا المْشْرُوعْ
اللي خْيْرُوا مَا يْصْلاَحْ للي فِيه الجوعْ
لَكِن يْفِيدْ غِيرْ اصْحَابْ المَالْ
اللي وْلاَ شَانْهُمْ مْرْفُوعْ
هَكا ضْحِيتِي يَا مْدِينَة الجْمُوعْ وْالدْمُوعْ
لِيلْكْ مَا بْقَى يْضْوِيهْ شْمُوعْ
بْنَادْمْ فِيكْ بْالهْمْ وْلاَ مْتْبُوعْ
مْلي كَتْبْدَا شْمْسْ نْهَارُوا فِي الطْلُوعْ
حْتى يْرُوحْ لِيلُو
وْيْرْجْعْ لِْبيتو خَايْفْ وْمْفْزُوعْ
